Мэндчилгээ

  

Европын орнуудаар тархан суугаа нийт сагсан бөмбөг сонирхогч, баг хамт олон, найз нөхөд болон биднийг үйл ажиллагааг дэмжигч хувь хүн, албан байгууллагууддаа Европ дахь монголчуудын сагсан бөмбөгийн холбооны удирдах зөвлөлийн өмнөөс энэхүү шинэхэн нээгдэж буй цахим хуудсаараа дамжуулан энэ өдрийн мэндийг хүргэе.

 

Тэртээ 2006 онд БНЧУ-д зохион байгуулагдсан анхны Европ дахь монголчуудын сагсан бөмбөгийн тэмцээнээс хойших олон жилийн хугацаанд бид сагсан бөмбөгийн спортоор дамжин танилцаж, найзалж нөхөрлөж, сайдаж муудаж явсаар өнөөдөр өөрсдийн холбоотой, нэрэмжит тэмцээнүүдтэй, Европ байтугай дэлхийд томд орох монголчуудын нэгэн хамт олон болон өргөжжээ.

 

Надад итгэж холбооны тэргүүний ажлыг даалгасан бүх сагсан бөмбөг сонирхогч гишүүддээ баярлалаа. Шинэ холбоо байгуулагдаад удаагүй ч өнгөрсөн хугацаанд нэлээдгүй ажлуудыг төлөвлөж гүйцэтгэсээр явна. Энэхүү ажлын төлөвлөгөөний хүрээнд бид баг хамт олноо бүрдүүлэх, холбооны бүтэц, дүрэм журмуудыг боловсруулах, Монгол улсын бүртгэлийн ерөнхий газарт холбоог бүртгүүлэх, холбоог сурталчлах, холбооны гишүүнчлэлийг үүсгэх, олон нийтийн сүлжээний болон цахим хуудаснуудыг бүтээх зэрэг ажлуудыг хэрэгжүүлээд явж байна.

 

Бидний энэ жилийн нэн тэргүүний ажил бол Ковид-19 цар тахлаас шалтгаалж гурван жил завсарласан Европ дахь монголчуудын сагсан бөмбөгийн насанд хүрэгчдийн аварга шалгаруулах XV дахь удаагийн тэмцээнийг зохион байгуулах байлаа. Энэхүү нүсэр ажлыг зохион байгуулахад тусалж дэмжиж хамтарч оролцсон Нордрайн-Вэстфален мужын Герман-Монголын үүд нийгэмлэг, түүний дэргэдэх Монгол залуус клуб, ХБНГУ дахь Монгол улсын ЭСЯ, Монгол улсын соёлын элч О.Оюунтуяа, ХБНГУ-ын улсын Берлин хот дахь сагсан бөмбөгийн Монбер багийн хамт олон болон санхүүгийн дэмжлэг үзүүлсэн бүх хувь хүмүүс, дотоод гадаадын байгууллагууддаа нийт сагсан бөмбөг сонирхогчдынхоо өмнөөс талархаж байгаагаа дахин илэрхийлье.

 

Сагсан бөмбөгт зүрх сэтгэлтэй Та бүхэндээ энэ спортоос авдаг эрч хүч тань үүрд дундаршгүй байхын өлзийтэй сайхaн ерөөлийг өргөн дэвшүүлье!

 

 

 

​

​

​

​

 

 

 

 

 

 

 

Европ дахь монголчуудын сагсан бөмбөгийн холбооны тэргүүн  
Д.Эрдэмбаяр